萬人黨民建聯一年一度「路向營」噚日開鑼，今年主題係檢討民建聯定位，檢討與政府關係及金融經濟狀況，所以請咗政務司司長唐英年、醫管局主席胡定旭同行會新貴劉遵義出席，較稀奇係請埋大班鄭經翰到場，係首次請「另類」嘉賓去講嘢。
在場人士稱，唐公子發言時笑言，喺風和日麗日子，去到友善場合，說話都要慎言，因為政治隨時無風起浪，要好小心，有人覺得佢句句有骨，暗寸煲呔。大班則直指民建聯形象有先天缺陷，尤其係每年六四前扮啞不敢表態，任何政績都一鋪清袋，冇得救；另一個問題係新人面目模糊，只係識跟隨黨中央口徑，不能獨當一面，難成大器。