外形突出嘅MINICooper好似天生就有被改嘅基因，莫講古董MINI改完夠過癮，即使入得廚房出得廳堂嘅Cooper一樣俾人改到天花龍鳳，唔搶眼就唔安落。世事無絕對，方塊動畫CEO兼動畫製作總監Gordon就剛剛相反，雖然最鍾意改車，但就偏偏唔改馬力同至怕五顏六色。唔通改完唔覺先叫型？
記者：許維雅
攝影：陳陶鈞
無得改寧願唔買
做動畫設計嘅Gordon其實已經有架Benz，巧立名目買架車畀老婆同個女代步，買邊架、點改法都係自己話事，因為佢最大嗜好就係改車，無得改寧願唔買。「開頭諗住女人車，最好車仔細細方便泊車，加上屋企車位只夠放多部細車，所以MINICooper就最啱。起初老婆話想買Fiat，但我買親車都第一時間諗定有咩要改，Fiat實在無配件畀我改，MINI配件選擇多好多！好彩我老婆家都俾我說服到好鍾意，仲話搵唔到第二架車咁好。」改車係極之燒銀紙嘅嗜好，用23萬買架二手MIINICooperS返嚟，但就用咗10萬去改裝，唔肉赤咩？「獨特嘛！出街都唔想同人撞衫啦，加上自己做設計，將自己鍾意嘅構思放喺架車入面。
係唔改Performance
改裝可以好個人化，外表、操控性同馬力幾方面，我淨係唔鍾意改Performance，一來難放，二來我唔鍾意鍊車。」咁點解老婆架車唔係老婆話事點改嘅？「哈哈，我霸王硬上弓唔俾佢參與意見！如果純粹淨係買畀老婆就唔會買STurbo版啦，哈哈。所以我都好識做放少少粉紅色嘢喺架車入面滿足佢，不過放啲咩都係我話事！」
鍾意改車都係無聊人
對架車些微加減都如此執着，果然係創作人性格，不過奇就奇在改裝唔係越誇張越多人望越好咩？為何偏向黑白銀為主色如此低調？「MINI已經係Classic款，我又唔想改到佢鬼五馬六，想保留番原汁原味但又有少少自己特色。感覺就同自己鍾意嘅Fashion牌子一樣，好似agnèsb.、Undercover咁，望落去唔會好誇張，但你會覺得好型，所以自己改車時都係諗點喺basic上面加啲details。」香港水貨舖價錢貴、選擇少，要為愛驅畫龍點睛都需要有心水嘅配件，Gordon就有好推介，「我比較鍾意上網搜索配件，感覺會過癮啲，又可以一次過搵晒想要嘅嘢。有次上日本網頁mini-delta睇，見到有好多香港搵唔到嘅配件，開頭都擔心日本網唔送去國外，諗住博一博試吓sendemail去問，點知佢真係肯回覆仲幫我寄過嚟香港。連埋運費都平過香港水貨舖，平大概20-30%左右。」最後問到改裝配件方面有咩心水推介，邊部份最實用？佢反笑自己係無聊人。「好難推介，改車好個人選擇。好似我自己架車改嘅地方好多就係無實際用途，鍾意改車嗰啲人都係無聊人，唔求實際㗎，好似我架車改完無快到㗎，不過個心係會舒服咗，開心啲。改車會好似毒癮咁，改完呢Part之後，成日又會心思思再諗改邊度好。」
改裝位逐格睇
外部
賽車時作拖車用嘅拖環係Gordon最欣賞嘅改裝部份。
內部
噴油
將胎軨噴成啞黑色及迫力卡鉗噴成紅色。
$2,800
由車頭到車尾嘅白色雙粗線拉花。$1,600
全車連改裝人工費共：$100,000
Gordon改裝3大貼士
1.買車前先留意市場上多唔多配件選擇，歐洲車嚟計，Benz、Audi同MINI呢三大牌子都係首選。
2.改Performance之前要諗清楚，要量力而為，你會唔會用得着揸咁快，因為內在改裝好容易影響車身性能。
3.除非你無諗住放番架車出去，否則要衡量改裝後嘅二手價，改Performance同外表太誇張都會影響你放盤嘅速度。
