每年都有幾十個在囚人士參加公開試，為協助佢哋重返社群，懲教署會盡量幫佢哋應考，甚至搵後生女入監獄「陪考」。
近年公開試考oral用小組討論形式，懲教署人士透露，為免在囚考生事先夾定口試時講乜，影響考試公平性，所以佢哋會聘請「考生」入監獄，同在囚考生組成小組應試，呢啲「職業考生」多數係學生，開工時只要好似正常應考咁就得，考官會按在囚人士表現評分。有懲教署人員透露一個有趣現象，如果「職業考生」係男仔，在囚考生一般比較沉默，反之如果係女生在場，考生就變得口若懸河，佢話可能在囚考生多數係男仔，根據異性相吸原理，自然會表現得雀躍啲。