一山不能藏二虎，你勁定我勁？《神鎗手》就由這種恩怨發展起來，而且加上配角陳冠希，數起來三隻虎先真。不過黃曉明的角色太令人聯想起哥哥的《異度空間》和《鎗王》般神神哋，而小齊原來是奸角，陳冠希到底跟邊個做師傅好呢？
記者︰陸俊雄
攝影︰楊錦文（Products）
自信自負只差一線
做得狙擊手都要自信心爆棚，真實是這樣，戲中三位帥哥亦一樣；不過人總有妒忌，本以為自己好勁，點知發現一山還有一山高，放唔低，悲劇就咁發生。戲中黃曉明是最厲害的神鎗手，點知小齊出於妒忌和討厭黃的自負，於是設計陷害黃坐監，鎗手間的戰幔由此拉開！
陳冠希在戲中是配角來的，加入了狙擊隊後想挑戰黃的紀錄之餘，又學了其閉氣開鎗法，小齊當然不想自己發掘的人才學仇人的伎倆，加上又怕他走上自負之路，於是處處針對；到底陳冠希最後點揀，想知就要買碟睇喇！
Lift中激戰必睇
忘記那些大量扮有型的畫面，《神鎗手》幾場鎗戰的設計其實都有心思。例如搶炸藥那場，估不到黃曉明可以在天橋柱的空隙上埋伏，平日都沒有想過那處可以放到個人入去。但話時話，黃曉明在戲中太神了，例如劫囚車那場，離事發現場鬼死咁遠，連小齊手上支鎗都打到，會否誇了一點？另外有一場Lift中困獸鬥也是相當特別，四個演員在這樣細小的環境下亂鎗掃射，《無間道》都未有咁拍陳永仁就死了，接連噹噹噹噹，聲效最過癮一定是這幕。
Bonus無驚喜
特別收錄雖然有刪剪片段和Makingof，可惜真係有點失望。先說刪剪部份，有段陳冠希的戲，還以為他有好多段被刪的，原來只得一場雨中查車牌、跟蠱惑仔對峙，但張力不足，難怪被刪去。至於Makingof有個鎗械知識篇，心諗會否講解戲中用的是甚麼鎗，用的是何種子彈等，等我這些鎗械白癡學點新事，點知純粹說拍攝前要找來過氣狙擊手教持鎗姿勢等，完全唔夠喉！
神鎗手（$149/Blu-ray）
