暗殺政治人物呢啲事件，八方以為睇戲先會發生，估唔到香港都有，「民主之父」馬丁去年原來係暗殺目標，好彩警方拉到人，否則後果不堪設想。警方高層極重視呢單案，因為調查時發現好多明顯係針對馬丁嘅資料，絕不簡單。據警方資料，殺手去年8月被捕，當時正係立法會選舉拉票緊張時刻，不過馬丁見慣大場面，無被嚇窒繼續四出助選。
報答馬丁自願做人盾
馬丁噚日朝早同美國眾議院議長佩洛西食早餐，八方到場，見到酒店將餐廳清場閒人免進，以為馬丁生命仍受威脅，警方要嚴防殺手，原來只係保護佩洛西措施。白鴿黨高達噚日就話好感激馬丁冒生命危險落區幫佢拉票，事關拉票地點都係人頭湧湧、四通八達嘅地方，最啱殺手落手，慶幸馬丁時運高，佢先冇咁內疚。
高達又話為報答馬丁捨命拉票之恩，佢自願做人盾，今日六四遊行時會企喺馬丁附近，有甚麼風吹草動，就第一時間撲出嚟保護前黨主席，子彈飛來擋子彈，刀劍劈來用身擋，鏹水照頭淋都唔怕，總之不容馬丁毫髮有損，兇徒唔好亂嚟。
雖則高達甘願做人盾，不過白鴿黨內部卻擔心保安級別未夠高，事關高達有名你叫，由佢出面護駕，恐防稍嫌不足，顧得住心口，又保護唔到馬丁個頭，遮得住上半身，對腳又成為目標，因此就算高達心口掛個勇字，都唔係無後顧之憂也。
民主黨主席仁哥年前俾人扑頭重傷，得悉馬丁受殺手威脅都幾緊張，不過佢話公眾人物在明，不法分子在暗，要避都避唔到，所以佢遇襲後冇特別加強保安，只係請咗個前警員做司機，萬一出事好歹有個照應，不過司機唔係保鑣，唔會貼身保護。
曾被當街襲擊嘅李卓人亦話有啲事情避無可避，而且佢被襲係個別事件，唔使咁大陣仗請保鑣，況且如果有人要出手，佢請保鑣都冇用，總有保安漏洞被人識破，結果都係一樣。收過刀叉恐嚇嘅梁家傑形容殺手向政治人物埋手好恐怖，不法之徒都算無法無天，希望警方早日破案，將幕後主腦繩之以法。
mailto:[email protected]