漢國置業（160）半年嚟升幅，落後近磅磚頭股，NAV折讓講緊仲有70%，買漢國大落後。漢國半年嚟升咗51%，睇落好似好誇張，但同樣係本港老牌磚頭股，好似大昌（088），同期就升咗1.2倍，至於莊士機構（367）就更加升咗1.5倍，漢國實情大落後。
漢國近年嚟積極發展內房業務，兼且成為集團重要嘅收益貢獻。嚟緊日子，漢國有嚟自重慶查氏中心、廣州寶翠園及褔田漢國城市商業中心，項目提供樓面面積超過420萬平方呎，集團嘅內房元素，一啲唔弱。好保守計數，呢批物業每方呎係咁意增值100蚊，幾乎等於漢國本身市值4.8億銀。漢國最新NAV6.48元，現價（1.91元）折讓高達70%，內房股當中，漢國折讓又係吸引到痹。呢轉博漢國翻半番到2.86元，折讓仲講緊高達56%，目標價仲仍然好低殘。
寰宇現金多折讓大
寰宇（1046）5月頭公佈話出售葵涌物業，套現2800萬銀，連埋去年底手頭現金1.39億銀，估計集團現金上到1.67億銀。集團銀貸得20萬銀咁大把，即係話每股淨現金講緊10仙，高過現價（8.2仙）。寰宇最新NAV18.8仙，折讓56%，又有折讓墊底。
再講，寰宇財政健全之餘，成間企業市值都係得1億銀多少少，好有變身嘅潛質。又當排除呢個可能，寰宇淨係上番每股淨現金值10仙，現價都要升18%，短打都有魚有肉。
錢雋