上星期貼冷膽，雖然命中祖記贏3:0，但阿仙奴唔爭氣，貼佢主其他，上半場已經4:1，但下半場竟然入多兩粒都唔得，未能起孖真係唔好意思；今次喺球季最後一次同大家見面，希望中番一次轟轟烈烈嘅大冷過關。
西甲周日煞科，吼住兩支主隊愛斯賓奴同貝迪斯可以大勝，博開冷膽；先講愛斯賓奴主場對馬拉加；巴塞隆拿近期威到盡，攞埋三冠王，不過同市嘅愛斯賓奴都唔弱，近7場贏足6場，夠晒分護級，今次純粹主場謝幕；「升班馬」馬拉加一如所料，臨尾「煞車」唔攞歐洲賽資格，咁又啱，事關以佢哋班底，來季踢擴大規模嘅歐洲聯賽，隨時兩頭唔到岸，降埋班都似。季初馬拉加贏過愛斯賓奴4蛋，今次博「愛奴」連本帶利攞番，揀個主隊贏5:1嘅67倍波膽。
另一場貝迪斯對華拉度列護級大戰；貝迪斯喺西甲都屬常客，降班通常都冇佢哋份，今場只要擊敗華拉度列，就肯定成功護級；睇番華拉度列，原本以為風流波，點知臨尾突然腳軟，近10場攞得3分，上仗主場對同級對手希杭都輸1:2，士氣呢啲嘢，冇就係冇，今場都係博唔到分，求神拜佛奧沙辛拿、希杭贏唔到波好過，波膽就揀貝迪斯贏3:1。
再追祖記「主其他」
意甲煞科，上周貼中祖記，今次再追；主場對拉素，後者以意大利盃冠軍身份，來季亦穩得歐洲聯賽資格，大家都冇嘢爭，打番場入球騷比賽，梗係博主其他啦。文︰牽牛