六四前夕，內地網上警察金睛火眼，「河蟹」晒所有反黨反革命反動內容，平反、六四呢啲字眼固之然絕迹一個不留，連敏感嘅人名都不例外，甚至殃及池魚。
有人向八方報料，指外國記者會（FCC）邀請陳日君樞機聽日演講，分享對六四嘅感受，呢個活動消息上載FCC網頁後，有人發現近日喺內地睇唔到FCC網頁內容，估計係同陳日君演講有關。
強力鎮壓六四內容
發現呢單嘢嘅人士指出，FCC網頁應該一向不在封殺之列，呢次忽然俾「河蟹」盯上，令在內地出差嘅會員好唔方便，唔可以第一時間知道FCC最新消息。除咗陳日君，鮑樸六四當日亦會到FCC演講，介紹趙紫陽回憶錄《改革歷程》內容同成書過程，有咁豐富六四活動，相信FCC網頁短期內都唔會獲內地解封。近日內地宣傳部門強力鎮壓所有疑似提及六四事件嘅內容，離譜到連六、四兩個字一齊用都唔得，傳媒界朋友話畀八方知，有啲編輯擔心走漏眼，為免被指審查不力惹上麻煩，索性放假去了。