幾日前立法會辯論平反六四議案，保皇黨寧願睇《93殭屍先生》都唔講嘢，被恥笑係行屍走肉「09殭屍先生」，查實佢哋對平反六四議案唔係冇反應，民建聯葉國謙喺投票前做出一個拇指向下手勢，指示一眾保皇黨齊齊反對平反六四，呢個咁「英」嘅動作播出街後，令佢一夜間爆紅網絡。
好多網民狂插葉國謙做出呢個手勢係公然侮辱香港人，同在鏡頭前做出粗口手勢嘅「中指黃」黃宜弘一樣咁乞人憎。平反六四議案應如何投票，一眾保皇黨好清楚，葉國謙做手勢有點多此一舉，不過佢係黨團召集人，有責任提醒兄弟，亦有人話投票前泛民默哀，葉國謙不忿被搶鏡，所以做出呢個象徵通殺嘅手勢還以顏色。