家啲投影機再唔係啲AV發燒友嘅玩意，貴有貴玩，平有平玩唔在講，以前就算想玩，屋企好似豆腐膶咁細，裝機駁線都好麻煩。家就冇難度，好似日本品牌Morisaki推出咗全球最細手掌型LED投影機M100，體積細到約62x38x61毫米，即係只有兩嚿大電芯並排咁大；而重量143克，揸起手超輕。
可投影到50吋畫面
JCShop老闆Alan話今次引入呢部機唔單止貪佢夠細，仲有埋內置微型喇叭，出得廳堂入得房，可以駁埋手提同家庭電玩PSP、PS3、XBOX360，拎埋出街玩都冇問題。LED燈膽可以用上兩萬個小時，每日用四、五個鐘都用足14年，只係賣2,680元。
小藍睇吓部機嘅規格，解像度未至於高清，但都有成640x480，大約有標清嘅質素。亮度係50流明，對比度200：1，講規格梗係唔及大機，但令人驚喜部機最大可以投影到50吋畫面，又支援16：9寬螢幕格式，睇戲打機一流。小藍即場試睇動畫《反斗奇兵》，效果都唔錯。
Alan話，部機針對年輕用家，但勢估唔到長輩都好like。全港擁有第一部M100，咪就係人稱阿姐嘅汪明荃囉。新婚燕爾嘅阿姐話，部機仔細細可以播到大畫面，匿埋間房播番同家英哥嘅結婚照正到痹。