模風在港越吹越盛，連日本攝影師都拜倒石榴裙下。曾為日本水着女模星野亞希操刀拍靚相的攝影師米原康正，前晚在中環舉行活動，即場為一班模拍照，各模狂擺甫士及冧米原，結果周秀娜以長腿低胸成功冧掂對方，令他暈其大浪。
在日本曾為不少水着女模如星野亞希拍性感靚相的攝影師米原康正，近日專程來港舉行展覽，前晚他在中環舉行活動，即場為一班模拍照，其中包括周秀娜、A.Lin、DaDa、HaileyC.及有「翻版Angelababy」之稱的AnnieG.，幾位模穿上背心短裙盡騷青春本錢。
狂擺誘人甫士
不過現場所見米原康正擺明最冧身穿熱褲的周秀娜，更親自出手教她擺甫士，周秀娜也識趣地擺出一連串劈腿及蹺腳等誘人姿勢，任他大影特影。米原康正接受訪問時透過繙譯表示影過不同地方的模特兒，香港的Angelababy（楊穎）也影過，問到他喜歡影甚麼？米原笑說：「我對女仔最有興趣，所以只影女仔。」
對於冧掂熱情的米原，周秀娜笑說：「佢個個都鍾意，對方都只係禮貌咁教我擺甫士，因為大家溝通唔到先用bodylanguage，絕對冇問題。」她又謂未遇過攝影師借故博懵，又笑言最好去日本時由米原擔任導遊。
A.Lin洩春光
稍後周秀娜會在書展中推出寫真，早前她到塞班島拍攝，當中有泳衣及內衣等性感造型，對於同期有多人出寫真對撼，周秀娜說：「唔緊要，大家欣賞唔同嘅嘢，但都要支持我，我自己都有信心。」另外，穿短裙的A.Lin影相時不慎露底，問她拍照的性感極限，她說：「最緊要影得夠時裝感，遮住兩點都OK，如果減肥成功又fit啲嘅話，赤裸都可以考慮吓。」
採訪：藍文浩
攝影：林德雄
