法國超級名牌Dior噚日喺沙田香港文化博物館舉行名為「黃金時裳」嘅展覽會，除咗不少博物館級的展品外，仲搵咗天王嫂熊黛林（Lynn）同國際級紅模杜鵑、戴小奕等同台行騷。
自動失蹤避紀香
馮仁昭記得自從城城緋聞舊愛藤原紀香高調來港「攻城」，作為「現在式」嘅Lynn就好似潛水玩失蹤，Lynn噚日終於現身話自己返咗內地搵銀：「去咗南京、長沙、南昌同廣州。」問到Lynn會否妒忌紀香，佢就笑笑口話：「點解要妒忌，之前演唱會佢都有嚟。」
對於城城日前透露事業第一，愛情只排第四，Lynn好似唔介意做阿四，佢話：「佢幾好，有上進心，又有孝心，不過都唔關我事，佢自己排，而自己都係排工作最緊要，第二位都未知，不過做嘢咁辛苦都係為屋企人，愛情都唔知排幾位，如果第時自己有咗家庭，會將佢排第一。」
「知道自己靚喺邊」
記者告知城城讚佢同紀香各有各靚，Lynn笑笑口：「多謝，每個女仔都要知道自己靚喺邊，我就有自信，一個女仔有自信好緊要。」
對於早前有傳佢嘅經理人Kim棒打Angelababy同陳偉霆拍拖一事，Lynn就話：「阿Kim都唔理呢啲私人嘢，咁大個人拍拖都管唔到，冇阻到工作就得，其他嘢乜都得。」
