今季係我最後一次喺〈海嘯救生圈〉畀貼士。雖則呢個禮拜六日聯冇波打，但仲有好多場日乙同埋日聯盃，而心水博湘南比馬作客岡山綠雉贏3:0。
今季日乙焦點落喺大阪櫻花身上，但湘南比馬都好值得留意。湘南比馬今季打得唔錯，過去17場聯賽攞到12勝3和2負，僅以3分落後「1哥」櫻花。今場佢哋作客綠雉佢哋只係得門將金永基因傷缺陣，換言之可強陣，其中坂本紘司、中村祐也及阿迪奧等腳風都幾順，聯賽總共入咗17球，作客冇咗臼井仁志、妹尾隆佑、小林康剛同埋西野晃平等球員嘅綠雉，3分應該冇走雞。考慮到綠雉對上3場聯賽，場場都失3球，就要比馬贏3:0。
冷選費蘭尼「首球」
同日日聯盃B組賽事，山形山神主場對千葉市原，主隊家陣的確冇季前咁搶鏡，但對手市原仲衰，聯賽排尾3，聯賽盃則喺尾2，而且冇埋攻守主力深井正樹同埋保斯拿，真係唔知點打。呢場就要主隊贏3:1，賠率有成21倍咁好分。
至於今周大波英足盃決賽車路士對愛華頓，愛華頓中場入球能力好強，特別係卡希爾同埋費蘭尼，其中後者今季入咗成9球，當中有3球係「首球」，而且佢夠高大，同泰利硬撼亦一啲都唔輸蝕，佢嘅首球賠率有成15倍，買得過。
文：青蛙仔