再生能源股近期升浪相信唔少散戶都始料不及，因為相關項目雖然發展歷史可謂悠久，例如太陽能應用及風力發電之類，幾十年前已經有人用緊，但問題係再生能源一直唔算普及，嚴格而言，對散戶尚係一種新興事物，一般傳統資源股都未必炒得掂，何況係再生能源股？
不過，今年初星俠曾提及，美國政壇改朝換代後，奧巴馬總統已表明銳意推動再生能源，加上全球環保意識高漲，唔排除市場忽然興起再生能源概念。
睇番近半年股海形勢，情況果然一如所料，升勢最勁當數興業太陽能（750）及中國風電（182），仲有陽光能源（757）近月走勢亦不俗，呢幾隻股份由低位起步累計升幅閒閒哋都有兩三倍。
芸芸再生能源股當中，以生產燃料用乙醇為主要原料、今年3月23日才掛牌上市的木薯資源（841）似乎尚未發力，以目前再生能源股氣氛當旺，唔排除木薯資源股價忽然起革命，不妨趁機先買一注，先上望其上市至今高位1.66元，以1.10元作止蝕。
雖然玉米都可以提煉乙醇燃料，但由於涉及糧食生計，所以近年內地要求及鼓勵乙醇生產商轉用非穀物作為乙醇原材料，木薯在替代能源運用上角色隨之漸受重視。集團係泰國最大乾木薯出口商，亦係內地最大泰國進口乾木薯片供應商，明顯受惠相關政策。
方星俠