記錄趙紫陽遺言嘅《PrisonerofTheState》（國家囚徒）大賣，中文版《改革歷程》千呼萬喚，噚日終於正式上市，好多人一早預訂，希望第一時間攞到手先睹為快，多個民主派議員電話近日亦響個不停，因為好多人都想託佢哋買呢本書，支聯會副主席李卓人話，電話多到應接不暇，因為人人都以為支聯會連「黃雀行動」都搞得到，實有特別渠道買禁書。
左仔託泛民人買書
《改革歷程》披露中共高層權鬥內幕，內地必屬禁書，就算上載互聯網，亦瞬即遭「河蟹」鏟除，不過呢啲書越禁越令人好奇，八方噚日就見到白鴿黨張文光，靜雞雞將本書交畀民建聯議員黃定光，只見黃定光一攞到本書，如久旱逢甘即刻揭開細讀。
八方問張文光何解會幫忙買禁書，張文光話黃定光擔心第一版被人掃光，幾日前已託佢買，佢拍心口話冇問題，所以噚日一收到新書，就立即送到立法會交貨。中共高層內鬥秘聞難得公開，左派對趙紫陽回憶錄感興趣可以理解，不過呢本話晒都係禁書，黃定光根正苗紅，老婆林淑儀又係工聯會高層，佢唔方便自己出面買，惟有搵張文光代勞。
惡補中共權力鬥爭
黃定光揭過幾頁書，八方問佢對六四真相有冇新領會，佢擺明唔想多提呢啲敏感話題，好無厘頭咁話，每個人都應該對唔同事件有唔同嘅認識，睇多啲書唔係壞事。黃定光唔想提，逼佢講都無謂，但佢勇於面對歷史，八方覺得值得年輕人學習，睇禁書培養正義感，好過一知半解，學似陳一諤、呂智偉咁大發謬論做小丑。
扮代表嘅煲呔更要立即睇呢本書，第一係了解六四內幕，更重要係惡補中共權力鬥爭係幾咁凶險，佢呢啲殖民地培養出嚟嘅「政治家」，幾時有見識過呢啲你死我亡嘅政治鬥爭？睇完呢本書，八方相信佢對國情會有截然不同體會。
除咗《改革歷程》，煲呔同一班左派應該睇嘅六四「禁書」清單，最少仲包括寫流亡海外民運人士心聲嘅《再回家》、記載六四經過嘅《人民不會忘記》同《歷史的大爆炸》，睇完呢幾本書，怕且煲呔唔敢再隨便扮代表。
mailto:[email protected]