無綫劇集《巾幗梟雄》播映至今，收視不斷飆升，前晚完場一分鐘更升至43點（約274萬觀眾）。昨晚該劇大結局，並在荃灣擺下梟雄宴，飾演柴九和四奶奶的黎耀祥和鄧萃雯均帶同家人出席。二人同聲希望結局可力壓05年韓劇《大長今》時創下的50點（約329萬觀眾）最高收視紀錄。
黎耀祥和鄧萃雯主演的《巾幗梟雄》播出至今，口碑和收視均很理想，昨晚播映一連兩集大結局，無綫更安排眾演員在荃灣愉景新城出席「東張西望巾幗梟雄會」，邊吃盆菜，邊欣賞直播大結局，但商天娥卻缺席，有指她因趕劇而未能赴會。
雯女謝雪心感動流淚
當大結局播至尾聲，播出柴九病逝時，坐在台下的雯女、謝雪心和徐淑敏都感動到流淚，眾演員又互相擁抱。祥仔以136票獲現場觀眾投票選出柴九一角最多經典場面，以一票險勝雯女，演員最後齊齊開香檳慶祝。
祥仔和雯女昨晚均帶同家人撐場，雯女除母親外，親友更坐滿一枱。雖然眾人不捨柴九死亡的下場，但祥仔說：「死係完美結局，柴九一生好精采，四奶奶幫佢完成將一車一車嘅白米運返鄉下，呢幕最浪漫。」
柴九和四奶奶未能有情人終成眷屬，祥仔說：「感情擺喺心先觸動人，希望原班人再拍劇，希望收視破紀錄。」
觀眾希望四奶奶和柴九再續前緣，雯女說：「留畀下一個劇啦，今次畀大家永遠懷念，咁先令人恨睇。」無綫製作部總監曾勵珍指雯女有機會成為視后，雯女說：「珍姐話得就得，信心係多咗，但我平常心，家先5月，仲有好多劇。我最希望係收視破《大長今》，證明本地製作係出色嘅。」
祥仔和雯女昨日又分別接受商台電話訪問，祥仔希望《巾》劇大結局收視有51點（約324萬觀眾），他說：「之前收視由15至39點，希望結局有51點，呢個係柴九心願，同破到《大長今》收視。」雯女說：「可以同外地劇鬥，攞到高收視最好啦。」問她會否希望憑此劇榮升視后？她說：「如果耶穌畀獎我都唔拘。」
基層市民免費欣賞
珍姐也有意安排《巾》劇演員再開另一部劇，對於有觀眾為雯女抱不平，指她憑劇集《金枝慾孽》的表現已有資格奪視后，珍姐說：「呢啲嘢冇得返轉頭，今次有機會。」
此外，無綫外事部副總監曾醒明表示昨晚安排的40席，當中一半是招呼台前幕後和家人，其中10圍是觀眾，餘下10圍安排給社區組織，曾醒明說：「佢哋嚟自新移民、獨居長者同單親家庭，無綫見柴九嘅出身係基層，所以免費安排佢哋嚟欣賞。」他又透露前晚《巾》劇完場前一分鐘收視勁升，他說：「完場前最高達43點（約274萬觀眾），平均有41點（約261萬觀眾）。」
採訪：卓寶花、王連連
攝影：林德雄
全城熱話：街坊唔想柴九死
由黎耀祥和鄧萃雯孭飛的無綫劇集《巾幗梟雄》昨晚播映大結局，祥仔主演的柴九肺癆死，雯女飾演的四奶奶則一直陪伴他走生命最後一段路，觀眾對於這個結局有讚有彈。
陳女士：「我就想柴九唔好死，最好係大團圓結局，柴九條命已經好苦，佢同四奶奶各自為對方做咗好多嘢，我支持佢重生。」
蔡先生：「我覺得家嘅結局鋪排得好好，雖然劇情交代咗好多好人死咗，或者覺得好可惜，但我認為見仁見智。有啲人好似大奶奶（謝雪心飾）咁樣，佢唔死都冇用，留番喺度獻世。」
李小姐：「我驚柴九死咗冇下集，如果大團圓結局就有機會再開下集，但家柴九死咗就激啲，希望無綫可以原班人馬再開劇，同埋祥仔同雯女可以憑呢套劇成為視帝視后。」
