亞視有新財團入主後首個台慶昨晚在大埔舉行，適逢對撼無綫人氣劇《巾幗梟雄》大結局，亞視除了眾藝員出戰外，更請來33F上圍的台灣「童顏巨乳」郭書瑤（瑤瑤）及香港的ECupBaby劉欣宜助陣，實行港台兩大巨乳正面交鋒，露罅露腰瞓身上陣，相反瑤瑤卻封胸玩密實，令不少港男失望。
亞視一眾藝員及應屆亞姐姚佳雯、顏子菲及賴霖恩等，昨晚齊集大埔總台出席亞洲電視52周年台慶酒會，適逢昨晚無綫收視爆燈劇集《巾幗梟雄》播出兩小時大結局，為了對撼力搶收視，亞視專程請來港台兩大導彈齊炸無綫，分別是33F上圍的台灣「童顏巨乳」郭書瑤及香港有ECupBaby之稱的劉欣宜，兩人甫出現即成全場焦點，實行上演一場港台巨乳大戰。
陳啟泰：睇到心都凸
ECupBaby穿上低胸露腰裝出現，盡騷豐滿上圍和纖腰，相反瑤瑤卻惜肉如金玩密實，以中性封胸打扮示人，只是隱約見到豐滿胸形，令不少男士大失所望。開騷前見瑤瑤和ECupBaby在化妝間有講有笑相當好傾，似乎未有火藥味。節目甫開始瑤瑤和ECupBaby一同亮相，之後瑤瑤即場跳舞，只見她又扭腰又瞓地表現相當賣力，連主持陳啟泰都笑說：「睇到我心都凸埋。」問瑤瑤被ECupBaby搶鏡，她解釋：「因為我要表演，她的身材很好，很可愛。」
如此密實會否擔心香港fans失望？瑤瑤表示這樣打扮會有不一樣的感覺，是否因為亞視畀唔夠錢，才惜肉如金？她聞言笑說：「當然不是，不關事。」ECupBaby都向瑤瑤大送高帽，她說：「佢好nice，身材又好又可愛，小朋友得嚟又唔會無知唔用腦。佢跳舞好好，我就唔得，因為我係肢體痙攣。」若瑤瑤來港發展豈會成為她的頭號勁敵？ECupBaby表示絕對不會，大家可以互補不足。
袁小曼：FCup唔平衡
眾演員中以媽咪級的陳少霞及有「岩石胸」之稱的落選亞姐袁小曼打扮最性感，甚有睇頭。問陳少霞以甚麼cup數迎戰？她笑說：「我都有Ccup，因為我用咗神奇胸圍，所以我係騙子。頭先我見到瑤瑤，佢真係好犀利，我覺得佢係真嘅，唔係呃人。」袁小曼被指身材被比下去，她竟反問：「唔係啩，我覺得自己身材適合C或者Dcup，因為我腰細，如果係Fcup就會唔平衡。」鮑起靜得知台慶夜對撼《巾幗梟雄》時即笑稱：「咁大家都弊傢伙囉。」
採訪：楊潔雯
攝影：仇志德、葉君海
