豬流感殺到埋身，官員警告香港隨時社區爆發，有人擔心如果疫情急轉直下，可能影響六四20周年悼念活動，原來支聯會早有後着，華叔噚日透露有應變方案，一旦豬流感大規模散播，出現人傳人情況，不宜舉行大型公眾活動，燭光集會就會押後至今年10月1日舉行。
喺街派白蠟燭
華叔又話萬一維園燭光集會要改期，也不代表不悼念六四，支聯會會喺街上向市民派發白蠟燭，市民可以自行在家點起一支燭光，默默向六四英靈致哀，表達心意唔應該受地點限制，只要燭光不滅，平反六四訴求都唔會平息。
支聯會副主席李卓人則話，估計今年出席六四燭光集會人數會大增，往年都坐滿幾個維園足球場，今年相信會塞爆維園，因此佢哋已作安排，借用埋維園凉亭、草地，畀市民入場參加燭光集會。六四20周年活動，終於踏入高潮，唔使等到下星期四，八方提醒大家，聽日下晝三點，毋忘六四大遊行喺維園足球場集合出發，遊行到政府總部。