維持治安、保護財產，社會通常都係由政府提供，例如警察去負責。收得埋嘅嘢，都仲算可以唔使保護，不過人所皆知係你嘅財產（例如物業不動產），就真係好難唔使搵警察幫手。
不過一旦政府運作出現問題，又甚至政府有意或無意侵犯私人財產，民間就好大機會以自發秩序形式去保護自己啲嘢。其中一個方法，就係組織民間自衞隊。
如果政府只係無能，自衞隊多數只會行吓beat，睇吓有冇賊仔。但如果政府係搶掠嘅源頭，自衞隊分分鐘演變成反政府嘅叛軍，同政府打內戰。就算政府有外國政府支持，作為手無寸鐵嘅市民惟有盡量躲避，唔好逞英雄。
官民「內戰」有排打
前晚，花旗國醞釀多時嘅官民衝突，卒之爆大鑊。之前政府透過聯儲局印鈔，令人覺得貨幣快會大幅貶值，從市民手上嘅現金、債券搶去購買力，毋須流血就去侵犯私人財產。
不過一眾買開債券嘅人，就自發組織自衞隊成bondvigilantes，喺前晚罷買債券，令政府就算有大陸等盟友支持，都要出高好多嘅利息，先出到債券、借到錢。而類似嘅內戰仲有排打。
不過當兩方駁火、槍林彈雨之際，股市就仆直。孫柏文奉勸大家，唔好逞英雄，今日係五月最後一個交易日，要把握最後落車機會，嚴守sellinMay。
孫柏文
http://phatdat.blogspot.com