馬鞍山銀湖．天峰噚日第二日賣樓，但售樓處的墟冚程度絕不比首日遜色，不少市民更一早排隊，睇吓仲有冇平貨揀。
信置（083）見他們一場嚟到，仲排隊至少1個鐘頭，唔想佢哋空手而回，都好識做，趁端午節，每人送對靚糉補數！（見圖）
今時今日啲地產代理，除要口才了得外，首要條件係要捱得眼瞓。
近年發售嘅大型新盤，唔少首日開盤都要馬拉松式賣通頂，繼天水圍栢慧豪廷後，今年最具規模嘅銀湖．天峰，首日亦通宵賣樓，好天收埋落雨柴嘅地產經紀，為做生意，難免要捱更抵夜，陪買家揀樓，不少經紀捱通宵，第二朝飲杯咖啡提神後，繼續開工，部份返屋企冲個凉，換件衫又再作戰。
遊客注目探究竟
香港人排隊買樓嘅盛況，亦引起外國遊客注目。由於銀湖．天峰售樓處設喺尖沙嘴旅遊區，加上現場聚集大批經紀同市民，唔少遊客見到咁多人聚集，亦好奇上前向記者查問發生乜事，睇嚟佢哋應該好少見呢啲賣樓場面。