吳卓羲昨日接受商台節目的電話訪問，對於自己在《巾幗梟雄》的演出備受好評，他就謙虛表示是因為觀眾睇得投入，所以才會覺得他演技有進步，而且他希望今晚播出的結局篇收視能過40點，最重要日後可以原班人馬再合作另一個題材的新劇。
睇淡Laughing哥
由於今次拍《巾》劇令他有機會與多位好戲之人合作，吳卓羲坦言自己獲益良多，而且他更會主動向黎耀祥和鄧萃雯請教，他大讚兩人會提攜新人，他說：「四奶奶好多場戲都拍得好好，至於柴九最令我深刻一場戲就係敖嘉年用5條金條收買佢，但最終佢擲番金條落地上，佢真係好犀利嘅演員，咁多對白都冇NG，永遠都係一take過，佢每拍完一個shot都會有人拍手掌，佢真係做晒功課，所以唔使帶劇本入廠。」
不過當問到今年無綫台慶視帝睇好「柴九」黎耀祥或《學警狙擊》的「Laughing哥」謝天華時，吳卓羲因為兩部劇都有份演出，所以坦言難以決策，但他說：「我鍾意柴九多啲，佢角色變化得好犀利，真係值得我去偷師。」
此外，劇中飾演蔣喬的岳華昨日到銅鑼灣綵排萬眾同心公益金，對於《巾》劇今日大結局表示十分期待，他說：「梗係越高越好，最好過50啦。」對於劇中早死，他表示劇情所需，他說：「我唔死佢哋點去爭權，我已經遲咗死喇，原本第8集就死咗。」岳華更大讚雯女及黎耀祥的演技，並表示有信心兩人會在台慶頒獎禮上奪獎。
採訪、攝影：王崇穎