自03年開始，陳日君樞機都會喺六四燭光集會前，出席香港天主教團體舉行嘅六四祈禱會，八方聽聞陳樞機今年應該唔會去，因為佢到時要去梵蒂岡開會，去唔到。
天主教會立場鮮明
但陳樞機仍然會參加教區嘅紀念六四活動，好似今晚就會喺堅道主教座堂，主持六四20周年紀念彌撒，今年主題係「莫失莫忘．六四貳拾難捨」，紀念當年為爭取中國民主自由而犧牲嘅學生同老百姓，又會為中國祈福。
其實唔止係陳日君樞機，香港天主教會一直好支持平反六四活動，而且立場鮮明，有泛民主派中人記得，89年香港天主教區搞過一場支持北京學運嘅大型祈禱會，由已故胡振中樞機主持，喺跑馬地馬場舉行，當年大大話話有成兩、三萬人出席。
有泛民中人話，當年胡樞機對平反六四，態度堅決，六四後曾經致函全球主教，請佢哋呼籲中國推行法治民主、關注香港前途。之後嘅陳日君樞機點樣支持平反六四、推動香港民主就更加唔使講，所以泛民中人話，香港天主教區為推動民主、平反六四做咗好多事。