陳冠希（Edison）前日突然由洛杉磯單拖返港，有指佢今次蒲頭係為破產老竇陳澤民銀解財困，佢係咪真係咁乖仔就唔知，但佢嘅回港行動就肯定自打嘴巴啦。
家人食飯過節
Edison搞出淫照風暴後，今年初佢以人身安全為由拒絕返港，申請喺加拿大出庭作供，結果港府安排成個法庭嘅人員專程飛去加國，因而被轟浪費納稅人金錢。
馮仁昭又諗起淫照事件之後，Edison仲聲言永遠退出香港娛樂圈，舊年2月返港接受警方調查，當時警方消耗大量警力侍候，既然佢認定香港咁危險，點解前日又唔需要保鑣就單人匹馬返嚟？早排佢去星洲宣傳電影時又話驚子彈恐嚇，時不時強調自己唔多安全，一提返香港就嗌唔好，家佢又忽然乜都唔驚，唔通佢對安全嘅定義有雙重標準？
Edison唔驚死返港，但噚日又故弄玄虛，施調虎離山計去鰂魚涌嘅公司開會，至夜晚7點幾佢同DJTommy先後離開，Edison坐車去尖沙嘴MarcoPolo酒店，會合老竇同家姐陳見飛晚膳過節。落車時Edison只由司機陪伴，仲邊行邊香口膠兼伸脷，雖然佢唔肯答係咪同家人食飯，但一面笑容勁輕鬆，完全睇唔出對香港有幾驚喎。
拉姑拒談栢芝
近日簽咗Edison公司嘅何超儀，噚日喺觀塘出席活動時就話日內會同Edison開會，問佢會唔會擔心Edison安全，佢大笑：「有我喺度唔使驚。」另外，噚晚狄波拉同夫婿鬍鬚Kong及前夫謝賢前後腳去福臨門食飯，提到新抱栢芝近況同Edison回港嘅問題時，拉姑就即時變咗聾耳陳。