煲呔早前公然喺立法會議事廳強姦民意，先就六四提出見利忘義嘅言論，跟手仲話自己代表晒全港人，激到港人又喊又叫，可算香港今年春夏之交嘅小風波。好彩前日港大最新調查顯示61%市民支持平反六四，創歷史新高，為有良心嘅香港人成功平反。噚日端午節，煲呔可能因為冇面目見大家，更愧對屈原，竟然一改傳統，龜縮到連龍舟競賽都唔去。
驚被問六四又講錯嘢
每年端午節，由特首打落一眾司局長例必出席各區龍舟賽，當年老董腳痛都要去，煲呔做咗特首亦唔例外，前年重踏發迹地沙田觀賽時仲笑得不知幾燦爛，到舊年雖然撞正副局長同政治助理國籍同薪酬風波，佢都一樣照樣現身，去到香港仔為龍舟競渡賽頒獎。
點知佢因為豬流感抗疫得分，被勝利冲昏頭腦，本月中喺立法會發表一番六四謬論，拖累民望止升回跌，仲被網民玩謝，加上港大民調狠狠摑佢一巴，加埋六四越來越近，喺呢個風頭火勢下，為免講多錯多，煲呔索性玩自閉，噚日一個龍舟賽事都冇出席。八方聽聞，佢嘅理由係想趁假期唞一唞，但心水清人士都認為佢係龜縮自保，唔係萬一畀記者或市民再就平反六四質問佢時點算？
煲呔隱形，三位司長都要幫拖現真身，分別去咗唔同地方觀賽。管樹大隊長唐唐入咗大埔，鬍鬚曾去咗屯門、黃仁龍坐鎮香港仔，連教育局局長孫明揚都要出馬，遠赴西貢做嘉賓，認真唔話得。其中以近日再派糖嘅鬍鬚曾風頭比較勁，有團體喺門口排成一字等佢入場，有市民見到佢時更向佢高叫「派糖」，但鬍鬚曾冇回應，只係笑而不語，並向現場人士揮手，成個明星咁款。
雖然鬍鬚曾自我感覺良好，但成個泛民都鬧佢呢次派糖措施無實效，已經磨拳擦掌準備喺今日財經事務委員會上向佢提出尖銳問題。佢答唔答到問題仲係其次，有議員最關心佢會唔會好似上次記者會咁面燶燶寸人？
mailto:[email protected]