民主黨新東支部年年都派出「民主龍」參加龍舟賽，今年最特別之處係請嚟新任副主席卿姐做鼓手，用佢嘅氣勢帶領民主龍前進。由於卿姐太忙，之前都冇乜點綵排，噚日去到現場靠黨員即場指導後大打天才波，唔少黨員發現卿姐都幾有打鼓天份，全程冇乜點甩beat，唔似係完全冇學過。
經歷上年主席何俊仁着長褲波鞋做鼓手嘅搞笑場面後，有黨員一早提醒卿姐，叫佢着得輕便啲，結果卿姐以粉紅色三個骨褲踢拖亮相，感覺超爽，再加上白色金龍tee，未上船已經贏得全場目光。雖然最後民主龍空手而回，但一班黨員覺得入到小組優異賽已經有貨交，事後仲拉大隊去大尾督祭五臟廟。