一個是粵劇名伶，一個是面目模糊的茄喱啡，在《巾幗梟雄》裏初結母子緣。大奶奶綿裏藏針，蔣必文咄咄逼人，將柴九和四奶奶趕入絕路。鏡頭背後，謝雪心谷火上眼，敖嘉年幾乎失聲，劇力逼人，真的母子連心。觀眾拍爛手掌，網民反應熱烈，熱捧大奶奶之餘，敖嘉年自覺終於升級：「我覺得家唔係茄喱啡，而係特約演員，有對白嗰種。」撰文：比華利、何慧斯 攝影：林德雄
謝雪心去年獲無綫金牌監製李添勝看中演出《巾幗梟雄》，這也是她過檔無綫後的首部演出，劇中她扮演米行老闆蔣喬（岳華飾）的正室殷鳳儀，她原本與其他3名妾侍相安無事，但當發現家產未必落在愛兒身上後，誓要為兒子蔣必文（敖嘉年飾）出頭，與得寵的四奶奶康寶琦（鄧萃雯飾）鬥個你死我活。
害人唔可以張揚
大奶奶性格表裏不一，外表大方得體，其實工於心計，擅於精人出口，笨人出手。心姐把大奶奶一角演得恰到好處，尤其是跟四奶奶多幕爭辯場面，心姐眼中火氣十足，她說：「大奶奶呢個角色幾難演，佢係綿裏針，胸有城府，但手段又高明，就算要害人都唔可以太張揚顯露，所以佢同四奶奶每次火併，佢總會用眼神『厲』對方。」
心姐表示雙目冒火完全發自內心，她說：「其實演奸戲比扮好人更加考功夫，我每次同四奶奶拍嗌交戲，事前都要做好多準備工夫，我怕水腫唔敢飲太多水，但因為爭拗，中氣都要十足先可先聲奪人，於是內心就谷啲火上眼，次次拍完呢啲戲，就算返到屋企都唔係即時可抽離，聲線又變得沙啞，所以我發火後都要飲鹹甘桔下火。」
心姐記得有次跟鄧萃雯通宵拍嗌交戲，二人拍完雖身心疲累，但返回化妝間落妝，她們又會不停再三討論，心姐話：「大家真係對嗌交戲回味無窮，呢啲就係enjoy嘅感覺，我好多謝雯女呢個對手，冇佢我又唔嗌得咁投入。」心姐大讚鄧萃雯的演技達爐火純青的境界。
菲傭叫我BigMum
對於大奶奶的悲慘下場，喪子後精神失常，落得要進入庵堂養老，心姐說：「呢個結局好好，如果淨係交代佢癲咗，唔及家講佢大徹大悟咁圓滿。我覺得一個人嘅榮華富貴，始終唔及親情重要。」
奸到出汁的大奶奶令心姐人氣急升，她表示平日出街，觀眾都愛暱稱她做大奶奶，心姐說：「就算唔少菲傭唔識廣東話，佢哋喺街見到都叫我BigMum，係咁打招呼，好搞笑。」就算訪問期間，咖啡室鄰座的一位西裝男都過枱跟心姐握手問好，看來大奶奶出巡，果然有氣勢兼吸引力。
謝雪心（55歲）
—原名孔令馥，孔子第76代後人
—白雪仙門徒、資深粵劇演員
—亞視藝員珈潁的母親
—96年加入亞洲電視，去年轉投無綫
眼前的敖嘉年官仔骨骨，說話斯文有禮，難以與劇中的敗家仔蔣必文扯上關係，未知是否觀眾也抱着同樣的心態看待他，所以當《巾幗梟雄》出街後，這個刻薄又賤格，經常設計陷害柴九，又用卑鄙手段逼四奶奶交出慶豐年的大鎖匙的的大少爺蔣必文，被觀眾邊看邊鬧，更紛紛在討論區留言，指敖嘉年表現有驚喜。敖嘉年笑說：「我都有睇過，整體成績好當然開心，今次嘅合作班底真係好好，呢部戲係我拍緊《勝雪鹽棧》（已易名《碧血鹽梟》）嗰陣，添哥同我講下一部戲有個好有發揮既角色畀我做，叫我畀心機。」
冇乜形象豁出去
受到李添勝重視，敖嘉年加倍認真讀劇本，他說：「到睇完劇本之後，我真係好緊張，我咁多年都未試做呢啲衰成咁嘅角色，壞事做盡又成日諗計去害柴九，好彩劇本帶得好好，而且好多前輩都好錫我，好似娥姐（商天娥）咁，佢教我用嘴臉同眼神去做呢個角色，我又成日問雯女同祥仔嘅意見。」綜合各方意見後，敖嘉年坦言已經豁了出去，他說：「做一個角色，如果太多顧慮，咁就真係死得，我係完全豁出去，我又冇乜形象，只係一向都係做乖乖仔，我覺得咁咪仲好，有新挑戰。」
回想當日拍劇的情況，敖嘉年說：「如果你問我最辛苦嘅地方，除咗捱夜之外，仲會係把聲，我喺戲入面成日粗聲咁同祥仔對罵，添哥都話過我哋兩個，叫我哋唔好嗌得咁犀利，但係祥仔話啲戲hold住喺把聲就唔出，所以我哋有共識一定要做，我哋私下傾偈嗰陣，我都話就算啞咗都要做，唔好浪費呢啲機會，唔係成日都有呢啲咁好嘅角色，既然機會嚟到，就要好好把握，希望唔好令添哥失望。」
至於最難忘場面，敖嘉年表示除了聽完遺囑後的反應外，其次便是與柴九在水中搏鬥，他說：「拍呢場戲真係好辛苦，我哋又喺水中搏鬥，喺水中我哋又要打交又要講對白，前前後後喺泳池拍咗六、七次，雖然我都識得游水，但係都飲咗好多啖水，祥仔嘅情況都同我差唔多，佢仲試過拍完之後，連面色都變埋㖭。」
當年被鬧茄喱啡
雖然多得蔣必文一角，令敖嘉年近期的人氣急升了不少，即使出街被人鬧，留言板有人讚，但因為多年前一個經歷，所以他表明會以平常心去面對，他說：「我試過出街食飯俾人話係茄喱啡，聽到人咁講，個心點都會唔舒服，今次好多人睇完都讚好，對我嚟講係好難得，如果畀我由頭再揀，我唔知有冇咁嘅勇氣再去行多一次，過程真係好難行，好辛苦，當然俾人讚開心一定有。」雖然升了level（升呢），但他沒被勝利冲昏頭腦，他說：「如果5年前有咁嘅成績或者會迷失，不過捱咗咁多年仲會咩，呢啲係用錢買唔到嘅嘢，係一種永遠喺心中嘅認同，我覺得家唔係茄喱啡，係升咗做特約演員，有對白有角色嗰種。」
敖嘉年（32歲）
—98年加入TVB
—曾任新城電台及香港電台DJ
—曾擔任《城市追擊》、《娛樂直播》主持
—演出劇集包括《少年四大名捕》、《律政新人王II》等