兩岸大三通之後，唔少在港上市的台灣企業都有返寶島掛牌打算，不過亦有台資企業似乎冇諗過咁做。台泥國際（1136）母公司台灣水泥董事長辜成允日前表態，大意係指台灣水泥已在台灣上市，專注台灣業務，而且營運情況良好，無計劃將台泥國際返娘家上市。
台泥國際唔打算返台上市，驟睇冇乜炒作概念，但台泥國際咁做，主要係公司業務專注在中國大陸發展，雖然唔返寶島掛牌，但公司就唔排除未來會以CDR（中國預託證券）形式在內地上市。如果換個角度睇，呢個point反而更吸引。
受制10日線阻力
早前受惠基建及內需概念，水泥股掀起過一陣升浪，台泥國際亦唔執輸，股價由4月初1.85元水平開始上升，至5月初一度高見4.30元，其後出現整固，動力明顯減弱。
本周三隨大市回升，收報3.55元，升2.9%，惜未能突破10日線阻力，反映股價目前還在消化早前巨大升幅，宜候回吐至3元水平才考慮吸納，中線目標4.50元。
方星俠