由網民一手促成的頭炮電影《LaughingGor之變節》昨日開鏡拜神，男主角謝天華、黃秋生、吳鎮宇、黃日華以電影造型現身，這個Laughing哥的大日子，無綫《東張西望》還派出曾傳與天華於夜店激咀的「味之天使」忌廉麥皓兒到場採訪，認真攞景兼贈興。
由邵氏兄弟（香港）有限公司與無綫電視合作的電影《LaughingGor之變節》昨日在電視城開鏡拜神，主要演員謝天華、黃秋生、吳鎮宇、黎耀祥、黃日華、葉翠翠，還有邵氏電影製作總監黃家禧、監製梁家樹、導演邱禮濤以及無綫製作資源部總監樂易玲均有到場，facebooklaughinggroup更送上果籃，預祝Laughing哥演出成功。
秋生出私伙衫
邵氏停產22年後第一炮《LaughingGor之變節》預計8月暑假檔期上映，昨日開鏡前夕下大雨，但一眾演員現身後，雨勢忽然停止，拜神儀式可以順利進行。邵氏再戰江湖第一炮，無綫上下高度重視，更派出多隊攝製隊採訪拜神儀式，《東張西望》則派出07年被指在台北夜店舞池跟謝天華激咀、然後結伴離開的「味之天使」忌廉麥皓兒採訪。
麥皓兒昨日在電話中說：「我已經澄清咗當年夜店相中人唔係我，公司都知道呢件事。」麥皓兒又稱與天華訪問時每次都有自我介紹，她說：「呢次同佢訪問好順利，我主要問吓佢電影個名點解由Laughing哥變成LaughingGor，佢話同網民有關，仲有佢都有講吓個角色。」
戲中飾演Laughing哥江湖大佬的黃秋生，造型突出，他自爆出動私伙衫，反觀Laughing哥造型失色，天華笑說：「佢出私伙唔出奇，佢咁有錢，因為今次講我9年前啱啱做卧底嘅生活，衣着會平實啲，而公司亦安排晒我啲服飾，所以唔使出私伙。」
談到群星拱照Laughing哥，他謙虛地說：「公司搵咗好多影帝級人馬助陣，樂小姐仲話曾志偉都會客串演出，畀咁嘅機會我去學嘢真係好開心，雖然我未知今次酬勞有幾多，不過我覺得呢個咁難得嘅機會重要過錢，而且又係邵氏重拍電影嘅頭炮，唔係每個演員都遇到。」吳鎮宇對於群星拱照謝天華，他說：「只要大家嘅心態唔係諷刺佢，我覺得冇乜問題。」
祥仔專責出手
臨危受命飾演警長的柴九黎耀祥表示上周接獲通知，他說：「我唔知係咪同《巾幗梟雄》有關，我覺得冇所謂，反正都係公司嘅電影。我嘅角色性格都好躁，全部打人都係搵我出手，7、8組戲入面都會同Laughing哥、秋生同鎮宇有對手戲，因為我最憎蠱惑仔，佢哋次次入差館，我都會用拳頭招呼佢哋。」
採訪：何慧斯、楊潔雯
攝影：仇志中、陳俊強
《LaughingGor之變節》主要角色表
謝天華：飾Laughing哥
黃秋生：飾一哥（Laughing哥的江湖大佬）
吳鎮宇：飾座頭（與秋生敵對的江湖大佬）
黎耀祥：飾警長阿武
曾志偉：飾社團話事人
元彪：飾警方高層
葉翠翠：飾律師（秋生女朋友）
黃日華：飾高級督察潘sir
黃德斌：飾秋生馬仔車仔
李思捷：飾鎮宇頭馬阿巢
資料來源：邵氏電影