美股前晚大升，港股梗係大龍鳳！大市昨日甫開，已見買盤洶湧殺入，中午食飯前恒指突破今年所創高位，散戶好友成竹在胸，預感個市有可能升過千點。下半場股市仍然好猛料，雖然未能升過萬八點收市，但都大升893點，收報17885，創下8個月以來新高，成交930億元。
銀行股大發神威，星俠最感欣慰係中國銀行（3988）升得最勁，收報3.23元，升9.4%。中行過去在內銀股板塊中一直被人看扁，但自從策略股東沽貨陰影解除後，走勢即見真章。難得表現咁爭氣，梗係值得開心！
全球股市再激起升勢，部份誘因係美國剛公佈消費者信心回升，搞到利豐（494）都扭轉本月初以來跌勢，急升10.8%，報21.30元。市場釋出對經濟衰退見底預期，近期反映乾散貨運之波羅的海指數連日勁升，刺激一眾航運股大爆炒上，表現最勁有中外運航運（368）及中國遠洋（1919），升幅分別有19.3%及11.8%。
細分航運股類別，除了乾散貨運以外，仲有集裝箱業務。最近留意坊間大行報告，普遍認為集裝箱業務最壞經營環境今年初已出現，以目前氣氛判斷，只要經濟復蘇動力仍在，該類股份有留意價值。中海集運（2866）昨亦見異動，股價抽升6.8%，高收2.18元，買盤再度增加，昨日已突破平均線阻力，現價可以追入，目標2.80元，跌穿1.90元止蝕。
方星俠