香港人血仍未冷，立法會噚日辯論平反六四議案，民建聯、工聯會議員揞住良心，如坐針氈都要留守投反對票，做足本份阻止議案通過；89年做記者曾報道學運、參與撰寫《人民不會忘記》嘅鼠王芬卻自動棄權，借頭借路帶隊去台灣訪問，不留在香港表態。
鼠王芬避走台灣
去年得左派配票當選嘅鼠王芬，自言曾經係學運熱血分子，人民不會忘記，佢卻選擇遺忘，近日以「香港各界精英領袖代表團」名義訪台，噚日先後同台北市長郝龍斌、海基會董事長江丙坤會面。鼠王芬引述江丙坤稱，台灣正籌備「台港商貿合作委員會」，稍後會同港府討論給予台灣居民落地簽證措施。
鼠王芬做議員後首次面對六四辯論就搵藉口閃人，着草台灣唔敢辯論平反六四，認真冇種！其實都唔使奇怪，佢由中聯辦力捧上位，身為中方「紅」人，豈敢唔跟西環指示？反而金融服務界議員詹培忠就唔同嘞，噚日唔止單挑泛民，仲話六四凌晨時分天安門廣場烏燈黑火，睇新聞只見到有人受傷送院，冇見到軍隊殺人。
金勞詹咁講嘢，即時辣㷫所有泛民議員，人人輪流反擊，指佢卑鄙冷血冇人性，何秀蘭仲梨花帶雨喊住衝入廁所，場面十分戲劇性。金勞詹唔似其他保皇黨、左派咁，辯論六四時龜縮，往年發言都係批評泛民乘機撈政治本錢，應該發展經濟唔好平反六四等，今年直情質疑屠城冇其事都算出位，難怪其他保皇黨聽到O晒嘴，私下議論紛紛思疑佢玩嘢。
金勞詹火水救火
有個保皇黨同八方講，今年六四20周年，港人要求平反六四情緒高漲，加上煲呔「扮代表」失言，西環早就提醒佢哋小不忍則亂大謀，要盡量低調度過民意洪峯，金勞詹咁講法好似用火水救山火，隨時係民主派Laughing哥，慌死六四、7.1冇人去維園，所以不惜犧牲小我，成全泛民。
另有分析指金勞詹素來愛與西環、煲呔作對，你唔想我出聲咩，我偏偏要講嘢，以示冇人㩒得住我，令你頭痕就最過癮。當然，佢亦冇種玩到盡，講到尾都係歸隊投票反對平反六四。
mailto:[email protected]