紐卡素跌落英冠變成「落水鵲」，大家都旨意靠舒利亞幫「喜鵲」飛返英超。點知肥佬班主艾殊利周二說足領隊舒利亞成個下晝，對方都未肯答應簽約，結果搞到肥佬公開向球迷道歉。嘩！出到跪地認錯呢招，舒利亞好見好就收啦！
「請舒利亞執教最正確」
話說周二下午12點，舒利亞同杜維抵達球會總部同總監林比亞斯見面，肥佬艾殊利3點坐直升機抵達，到夜晚8點先上機返歸，其他人等繼續談判。據說，紐記向舒利亞提供4年合約，舒利亞就要求絕對自主權同繼續投資買人，談判周三將繼續。
最戲劇性係肥佬周二晚竟公開道歉，「我向廣大球迷道歉，我呢幾季做咗好多錯誤決定，導致今日嘅災難，我感到非常抱歉！」肥佬跟住呢句先係重點，「我最正確嘅決定係請咗舒利亞執教！」林比亞斯就幫埋口：「我哋110%希望佢繼續教。」
搵定史提芬泰萊任隊長
肥佬同總監咁有誠意，我求大俠都大受感動，舒利亞表面唔簽約住，其實內心不知幾歡喜！英國《太陽報》就話舒利亞日前同球員見過面，親口提醒球員暑假咪超重，仲話7月1日季前操練見㖭！有現場人士表示，舒利亞留低嘅意圖好明顯。
我求大俠就話舒利亞肯定繼續「撚鵲」啦！有消息指舒利亞已有爭取升班人馬嘅腹稿，史提芬泰萊、畢特、夏柏有鬥心要挽留，前者仲會擔任隊長！其餘留隊球員包括杜夫、路蘭、安祖卡路爾、賴恩泰萊、古費利，位位有心有力，紐記升班冇難度！
不過，紐記始終係「落水鵲」，舒利亞要留住班球員唔易；好似阿仙奴就牛咁眼望實史提芬泰萊，其餘除咗皺晒皮嘅畢特同杜夫，都係當打球員嚟！睇嚟肥佬艾殊利難免要跪多幾次，說服班球員留低啦！