六四辯論嚇到唔少左派雞飛狗走鳥獸散，費事喺立法會大樓內被記者捉住問平反六四問題，呢啲嘢對左派而言，真係有口難言唔知點答好，偏偏有人就喺呢個敏感時刻重返立法會，就係「民主阿伯」馬丁。佢噚日忽然現身立法會，以普通市民身份坐喺公眾席旁聽，睇班保皇黨如何扮鵪鶉唔出聲。
老友搵議員幫手
馬丁呢次重返議會都有另一任務，事關佢一位中學舊同學有疑難要搵議員求助，馬丁唔係議員，就帶佢去立法會搵涂謹申幫忙。阿涂話不便透露求助個案內容，只係話馬丁位老友好特別，因為佢49年前，即係立法會仲係法院嘅時候，佢就喺呢幢大樓內行婚禮，事隔近半個世紀，先至第二度再到呢處，真係桃花依舊，人面全非了。
以前馬丁做議員時，最鍾意㩒鐘仔召集議員歸位聽辯論，唔好行開搞到流會，自佢退任，好似冇人繼承呢個做法，唔知佢噚日見到議事堂保皇黨玩失蹤，一張一張空凳擺在眼前，有冇衝動落去㩒掣呢？