立法會年年辯論平反六四，左派年年扮啞封嘴，噚日都唔例外，意外係公民黨黨魁余大狀都不在場。議員發言後，佢先匆匆趕返立法會投票。
事後佢同梁家傑企喺議事廳外大聲理論，離得好遠，八方都聽到余大狀投訴緊梁家傑，明知記者見到，佢仲表現得激動。後來余大狀話，噚日下午佢要出庭打官司，已交帶梁家傑發言時，幫佢講出不參與辯論發言原因係因公事而唔係迴避表態，點知梁家傑發言時唔記得咗，到佢趕返議事廳，辯論已經結束要㩒掣投票，搞到佢錯過重要辯論，所以好鬼激氣。梁家傑俾黨魁省到冇聲出，話已經慣咗做好好先生，「好似對住老婆咁，畀佢發洩吓就冇事。」