大肚潮媽陳慧琳（Kelly）廣告約不斷，近期更成為日本護膚品牌DHC亞洲代言人。Kelly月前挺着五個月身孕拍廣告，備受呵護，隔日開工，準時收工，更可以坐着影相，Kelly更自備健康午餐和暖風機。懷孕期間減少化妝的Kelly，洗面潔膚絕不偷懶，力保靚靚大肚婆招牌。
陳慧琳時尚潮媽的形象，從來備受推崇。Kelly去年結婚後，順利造人成功，懷孕絕對無損廣告商對她的鍾愛，近日她成為日本護膚及化妝品牌的代言人。
落妝油要快靚正
Kelly現時已懷孕七個月，她早兩個月、懷着五個月身孕時，開工為DHC拍攝新電視和平面廣告，原定在日本拍攝的廣告，也遷就Kelly移師在香港影樓拍攝，Kelly說：「今次一共拍咗三日，不過廣告商非常體貼，知道我懷孕，特別安排拍一日停一日，雖然製作費因此大咗，但佢哋都希望確保我有足夠嘅時間休息，而且要做嘅動作都好簡單，大部份時間只係坐低，又唔使着高跟鞋，感覺相當輕鬆。」
今次Kelly任DHC廣告亞洲區代言人，主打品牌的王牌DeepCleansingOil系列，廣告中Kelly穿上白色小背心示範洗臉。
Kelly直言落妝、清潔從來都是她護膚最注重的一環，她說：「之前做騷要上台，個妝梗係特別勁，所以落妝油一定要快、靚、正，cleansingoil夠力但又溫和唔傷皮膚。」
懷孕皮膚易敏感
Kelly續說：「家因為有咗BB，大肚婆皮膚又敏感啲，平時盡量都唔化妝，就算要出街，都好淡好淡少少lipgloss，但有冇化妝，日常basic嘅清潔都要做足，咁先keep住靚到生。」最近Kelly已減少工作，除了為年底推出的國語專輯錄音外，大部份時間都留在家中安胎。
撰文：DebbieLum
茶漬飯補身
懷孕中的Kelly，拍攝廣告時也很注重飲食，每天自備午餐，現場即製簡單又有營養的三文魚茶漬飯，晚上準時8時收工，然後回家吃住家飯。
由於影樓室溫變化大，Kelly更自備暖風機，以免着凉，非常緊張自己及BB的健康。疼錫自己之餘，Kelly也不忘照顧來自日本、上海的工作人員，不時叫助手買蛋撻、菠蘿油給大家做下午茶，自己就當然乖乖忍口。
駁髻襯金裙
DHC為拍攝這廣告，邀請了金像美指奚仲文為Kelly裝身，Kelly穿上超過20套服裝，其中一襲在電視廣告中出現的金色斜膊長裙，Kelly還駁上長髮梳髻，盡顯高貴優雅氣質，更看不出她懷了5個月身孕。
話你知：歷任俊男美女
面世20多年的DHC來自日本，04至05年才開拓中國市場，歷任代言人不論來自香港、韓國、台灣，都是俊男美女。男子組有周杰倫、Rain、池珍熙；女子組代言人則為清新氣質美女，如韓國美人金喜善和台灣的吳倩蓮及侯佩岑等。
