旺角維景酒店（前稱京華酒店）係03年沙士爆發源頭之一，咁啱得咁蹺，本港首宗確診人類豬流感嘅墨西哥患者，亦係入住「維景酒店」，只不過今次過咗對面海嗰間灣仔維景。6年內連中兩次頭獎，揸住香江4間維景酒店嘅香港中旅（308），主席張學武噚日出席股東會後亦忍唔住口，誇讚「維景酒店的影響力進一步加強，名聲大了，全世界都了解到中旅呀！」乜嘢叫危中有機、樂天知命，張總呢句話完全體現晒出嚟。
灣仔酒店出租率逾七成
一年一度嘅中旅股東會例牌喺銅鑼灣維景酒店舉行，家陣「維景」字號冇人不知，冇人不曉，超過半百股東依舊熱烈捧場，張總指灣仔維景個場太細，搞唔到股東會，之不過間酒店最新出租率有七成幾，比起同區酒店仲好，全靠旅遊業界關心，安排團體入住兼搞吓會議，振興番間酒店，家唔使點減價就有客。
執行董事許慕韓仲充滿自信咁講，即使再有人染病，中旅可以保證地方乾淨企理，旗下員工好似今次一樣，唔會受到感染，皆因佢哋有歷史經驗喎。灣仔維景被隔離足足7日嘅百名員工聽到，唔知應該高興定唔高興呢？
灣仔維景落閘封店再執靚重開，前後有兩個禮拜，許慕韓話損失過百萬，家仲同港府官員傾緊賠償方案，最終補貼幾多，大家拭目以待嘞！
李華華
mailto:[email protected]