民建聯噚晚召開中委會，有稀客現身，就係前行會成員鍾瑞明，原來民記聘請佢做受薪總幹事，7月上任，身價多少冇透露。唔少人聽到呢個消息都好驚訝，鍾瑞明履歷超班，身為政協，做政黨總幹事唔係大材小用，都係就業錯配。
多間上市公司非執董
其實鍾瑞明同民記中人早有淵源，又係港進聯成員，兩黨合併後佢過檔做顧問。民建聯總幹事出缺近10年，因為馬力做秘書長時親力親為，家陣要發大嚟搞，所以要請番個人睇檔，況且失業率高，「執政聯盟」幫忙創造一個就業職位當仁不讓。
鍾瑞明係港大國粹派中堅，畢業後入南商由低做起，85年任中英土地委員會中方代表，參與籌建土地基金，後來做埋基金行政總裁，回歸後係老董身邊紅人，獲委入行會，又做過房協、城大校董會主席。
老董落台後，佢被摒出權力核心，重返商界做過世茂中國CEO，後來轉去亨達國際做MD，現時係聯通等多間上市公司非執董，唔知同黨務有冇利益衝突，要唔要辭職。