港股近日整固，但細價股炒得好精采，好似隻華藝礦業（559）昨日一升就41%，問你點頂？另外中國風電（182）由今年初大約0.20元起步，升到0.75元以為差唔多，點知昨日照升10%，報0.83元。好多散戶都問家陣細價股咁熱鬧，究竟純係資金因素，抑或炒背後概念？
股市大升浪要靠資金推動，某些好耐唔郁的股份突然爆上，好可能係市場游資氾濫所致，無關甚麼概念，好似金源米業（677）呢輪股價咁強勢，唔通係炒「柴九概念」咩？
地產股昨升得最勁係嘉華國際（173），升幅近24%，收報2.19元；反映升浪向中小型地產股擴散，短線不妨留意麗新發展（488）。
短炒睇0.16元
麗展手頭有幾個重點地產項目均在2011年底前完成，包括與建行（939）共同發展的干諾道3號項目、與AIG合作的灣仔活道項目，以及大埔道項目和油塘商住物業，以現價0.135元計，根本未能反映麗展前景與真正價值。現價可追，短炒目標0.16元，以0.10元止蝕。
方星俠