雪妮這位粵語電影時代的女星，當年主演的電影《女黑俠木蘭花》大受歡迎，其後與武術指導唐佳結婚後便息影，直到多年前戲癮發作，復出加盟無綫，參與過不少劇集。今次她在《巾幗梟雄》演的嫲嫲雖然信佛，但也看不過長孫蔣必文（敖嘉年飾）的所作所為，直斥又賤又討厭。 撰文：何慧斯
雪妮在劇集《巾幗梟雄》中，飾演蔣喬（岳華）母親季玉如，這位地位崇高的娘親，一向在靜院靜修，潛心向佛，雪妮姐說：「我覺得呢部劇嘅背景，真係似我哋中國人以前啲大家庭，奶奶一定要啲仔女、新抱一齊住，孫仔孫女又玩埋一齊，但係喺得呢一堆度生活，少不免一定會有磨擦，呢個唔係講古仔咁講出嚟，真係會有呢啲感覺，只係呢部戲特別多。我嘅戲份主要集中喺上半部，講我喺靜院度住，最好乜嘢事都唔騷擾我呢個伯爺婆，好多時係過場，緩和吓啲氣氛。」
開工夠熱鬧
雖然戲份不多，不過雪妮姐笑說戲內同戲外大家都相處得好開心，她笑說：「人多係好熱鬧，我哋個個都帶好多嘢食返嚟，好似我個孫新抱徐淑敏，佢試過整好大盤壽司，成個廠都食唔晒，又試過每人都整一個餸，齊齊喺個廠度開飯，真係好似一家人，大家都好happy。」
《巾》劇叫好又叫座，幕前幕後都功不可沒，雪妮姐表示開拍的時候，大家都對這劇集有信心，她說：「拍嗰陣都知道唔錯，個個角色都好鮮明，第一、二集已經交代得好清楚，一企出嚟，睇起上嚟都好清楚同舒服。加上雯女（鄧萃雯）、祥仔（黎耀祥）呢啲觀眾同影迷都好鍾意嘅演員，佢哋真係做得好好同認真，呢個配搭又好有新鮮感，我個大孫必文（敖嘉年）都做得好好，雖然我係佢嫲嫲，但係我都覺得佢好乞人憎，好賤又討厭，點可以有啲咁嘅人㗎。」
做綠葉知足
雖然雪妮姐對這部劇讚不絕口，不過當問到她有否想過可以演一個會過足戲癮的角色時，雪妮姐很快便說：「冇喎，我覺得我家OK呀，我係享受開工拍戲嘅感覺，我唔需要太多，唔會去爭企喺咁前嘅位置。如果係套戲有需要就去，唔需要就算少戲份都冇問題，我覺得始終係中國人嘅社會，唔同外國，你問我嘅話，我都鍾意睇後生、個樣靚嘅演員，年紀大嗰個嘅戲份有用就夠，唔需要由頭帶到尾，觀眾睇個古仔最重要係睇得舒服，夾硬咁push好似同部劇走歪咗喎，喺我嚟講點為之叫滿足感，我覺得自己投入個角色，同成班工作人員合作開心，已經好好。」
今晚劇情
第22集：大奶奶害四奶奶收監
四奶奶（鄧萃雯飾）眼見必正（吳卓羲飾）終下決心為米行效力，故特意設宴慶祝，此時大奶奶（謝雪心飾）卻偷潛入四奶奶的房間於其日記上做手腳，更暗中向太平軍趙將軍（黃智賢飾）通報四奶奶與王爺私交甚篤，趙將軍即到蔣家派士兵搜查四奶奶房間，更搜出與王爺的書信，認為四奶奶與王爺另有企圖，認定四奶奶對太平軍不滿，最後將四奶奶收監，此時四奶奶把蔣家大鎖匙交予必正保管。
由於四奶奶被收監，故大奶奶立即漏夜把必文接回蔣家，更要求必正交回蔣家大鎖匙，最後必正以蔣家大當家身份以木棍追打必文，更趕其出家門，可惜最後不得要領。柴九（黎耀祥飾）為求救出四奶奶，不惜威迫各米商交出團練費，更一度將各米商的家人扣押，最後驚動趙將軍之下，柴九借機向趙將軍大爆彭鏗之惡行，即獲眾米商支持，但彭鏗更一度反咬為柴九所為，更用鞭打柴九。趙將軍眼見眾人對四奶奶的愛戴，最後終放四奶奶。
小八卦：「499」「79」網路橫行
大家都知無綫高層樂易玲有個取其姓名諧音「620」的花名，想不到連憑《巾幗梟雄》爆紅的黎耀祥、鄧萃雯及惠英紅，也有他們所屬的數字花名。這些數字花名最近更在討論區通行，可謂見代號便知其人，如祥仔的柴九，喚作「79」；雯女扮演的四奶奶便是「499」；三奶奶惠英紅則是「399」等等。
