噚日，孫柏文行過書報攤，見到雜誌封面有「四叔」李兆基個仔李家誠嘅全家福好sweet，佢老婆徐子淇同啱啱出世嘅二女都容光煥發，值得戥佢哋開心。
不過噚日同朋友R傾開呢個封面，佢問點解個BB出世都冇兩個禮拜，就已經識笑？係喎，自己啲親友嘅BB細時都係唧都唔笑噃。R話可能請嘅營養師好勁，咩DHA、Omega3，徐子淇大肚時食得足，所以個B一生出嚟就咁精靈。
識投胎 梗識笑
其實親朋戚友啲B唧都唔笑嘅原因，係因為小弟個社交圈子、血源網絡都比較清貧，啲B一出世見到自己喺lotteryoflife抽籤時抽到佢哋，第一個反應都係：「頂！唔係嘛。」所以未撇低啲失落前，唧都唔笑。相反，如果個B一出世擘大眼知徐子淇係自己阿媽、李家誠係老竇、李兆基係爺爺，仲唔笑到見牙唔見眼？
入正題，市場傳聞克萊斯勒（Chrysler，前稱佳士拿）將會今晚被正式分拆，做車嗰部份將會正式離開破產保護，快過霆鋒開跑車。開得咁快就當然有好多人喺冇公義嘅情況下被車死，包括好多dealer分銷商。
佢哋噚晚入稟法院，希望個官唔好咁快割走啲資產等佢哋唔使血本無歸。雖然我落筆呢刻唔知點判，不過如無意外個官都係叫佢哋F.O.。我睇過入稟狀，怨氣好重仲要楚楚哀求，如果乜都冇，分分鐘玩汽油彈或自焚。好似當年小人蛇家人一樣，法庭搵唔到公義，就會搵另類嘅公義。
孫柏文
http://phatdat.blogspot.com