近朱者赤，近墨者黑，鬍鬚曾向來脾氣唔錯，俾人激多兩句多數一笑置之，唔似得煲呔咁會黑面還拖，點知噚日鬍鬚曾喺紓困記者會上竟然煲呔上身，幾度發火。
第一波係有記者質佢，點解唔及早公佈負責遴選金管局新總裁嘅三人小組已經屬意攞命陳接班，批評佢咁做隱瞞公眾，本來都笑瞇瞇嘅鬍鬚曾驟然面色一沉，以今日唔係傾呢個話題為由拒答。點知其後提問嘅記者，先指紓困方案只係吊鹽水，又話係新瓶舊酒，總之冇句好，鬍鬚曾忍唔住話呢啲意見對佢唔公平。
最後一擊由有線記者發出，直指措施對四無人士冇幫助，鬍鬚曾聽到火都嚟，反問：「咁你有乜好建議？」然後好似煲呔咁歪一歪嘴冷笑。其後有人問鬍鬚曾做乜咁躁，佢堅持冇黑面。