正所謂癡癡呆呆，坐埋一枱，蛇鼠一窩，永不嫌多，前有港大學生會倒台會長陳一諤淡化六四屠城、醜化學運領袖，再有青年發展網絡召集人呂智偉指六四民運因為香港人捐款支持而變質，咁左嘅仔真係青出於藍，曾主席後繼有人、振英哥可以交棒、曾人大老懷安慰了。
同情力撐兩皇仁仔
支聯會華叔話呂智偉言論仲荒謬過陳一諤，諤少被點名與呂智偉齊名，樂極忘形，前日喺自己個blog度撰文力撐同道中人，聲援兩名皇仁仔李文棋同溫駿瑋。李、溫兩人指六四事件是學生先襲擊軍隊，「誰說他（們）一定是錯？……他們提出質疑，提出自己的想法，人們可以不同意，但至少要懂得欣賞他們表達意見的勇氣。」
諤少又指以語言暴力「鎮壓」呢班初生之犢，「難道就顯得出民主之正義？難道就可以平反六四？」六四屠城事實俱在，歷史不容歪曲，指正謬誤唔係「鎮壓」，諤少偷換概念擺明屈機。佢好同情李、溫兩個學生，質疑有關兩人言論嘅報道唔準確，「不要害怕，不要憤怒，眼前的風波不過是一剎那，但他帶畀你們的磨練，教你們堅強成長，不用為受了委屈、寃枉而氣餒，因為你們學懂了原諒與包容。」
香港人可以容忍仔唔識嘢，卻冇咁容易原諒屠夫，呂智偉指89年李卓人上京「派錢」令學運變質，八方相信當年絕大部份香港人都有捐錢支援北京民運，呂智偉言論同煲呔「扮代表」侮辱香港人如出一轍，網民紛紛起佢底，發現佢同民建聯關係密切，去年中青年發展網絡曾聯同民建聯搞捐贈書包文具玩具活動。
呂智偉熱衷政治，07年陳太同葉劉角逐馬力遺缺世紀之戰，佢幫葉劉助選，拉票時一度與陳太助選團衝撞，被指攻擊陳太支持者，呂智偉否認有任何攻擊性行為，反責對方可恥。據呂智偉夫子自道，佢幾年前自資讀副學士，每年學費要45,000元，由於父親喺05年工業意外去世，一家三口要靠恩恤金過活，佢更要做四份兼職幫補家計同交學費。
mailto:[email protected]