不少大型電器零售商均提供延長保養服務，客戶繳交年費後，在電器本身保養期過後，繼續提供保養維修服務。惟有購買了此類服務的讀者反映，電器失靈需要維修，索償時卻被拒絕，埋怨零售商推銷服務時沒清楚解釋。
個案一 職員沒有講解保障條款
讀者馮先生於2007年10月，以約6千元在豐澤電器購買一部Compaq手提電腦，並以1,068元向豐澤購買「安心保」，可享兩年延長保養服務。本月他因電腦頻頻自動關機，遂聯絡豐澤，職員着他將電腦交回HP維修部處理，先付費，隨後再憑單向該公司索償。HP檢查後，指因電腦積塵導致損壞。
馮先生按豐澤指示，支付700元檢查費後索償，惟索償時豐澤才指保養條款規定，廠方建議之定期保養、檢查、清潔、潤滑加油或調校等服務，均屬不受保障範圍，故拒絕賠償，令他氣忿難平。「職員推銷嗰陣，冇詳細講解過保障條款，淨係話加多1千蚊就可以有多兩年保養，包意外損壞同維修保用。我當時諗住買個保障都好，冇諗過電腦會積塵搞到要維修，豐澤就話係清潔問題，所以唔保！」
豐澤回覆本報時只表示已聯絡馮先生解釋條款內容，本報聯絡馮先生了解，他稱：「我後來發現，原來安心保有好多嘢唔保，例如喺冇機械或電器故障情況下引致嘅檢查費就唔保，賠償嘅維修費總額，要唔超過貨品零售價，但係唔知計我買機時嘅零售價，定係維修時嘅價錢。」
個案二 保養熱線無人聽阻維修
讀者黃先生於去年3月在沙田國美電器購買一部飛歌牌洗衣機，並以450多元購買延長兩年保養服務。
今年4月初，他發現洗衣機漏水，即按保養服務條款，致電國美顧客服務熱線要求跟進。惟多次致電均聯絡不上，他遂直接到分店查詢，職員指點他聯絡飛歌，先付維修費，再向該公司申索，惟飛歌卻表示應由國美直接支付維修費，令他無所適從。
黃先生怒言：「國美張條款寫咗要客人先致電顧客服務熱線獲取授權，先可以有保養，結果條熱線根本唔通，連前線職員都唔了解條款，亂點個客，真係混亂！」
國美電器回覆，接獲本報轉介黃先生個案翌日，已即時聯絡他安排代理商師傅上門維修。該公司續指，客人的產品在代理商原廠保養屆滿後，如需維修，只需於辦公時間內致電客戶服務部熱線聯絡該公司，經了解情況後，會安排代理商師傅上門進行維修。
檔案編號﹕0409031、0511059
業界意見：延保養宜計算有無着數
有電器業內人士表示，不少消費者對保養條款一知半解，購買延長保養服務後才發現不合用。他提醒消費者購買時，須留意條款限制，尤其保障範圍及最高賠償額。
他稱：「例如包唔包零件，如果包，係咪全包？好多時會講明唔包某啲貴嘅零件，例如LCD電視嘅電路板，要換就好貴。仲有人工、運費、上門維修同借機服務，通常電器代理提供嘅保養會包，但係零售商提供嘅延長保養就未必做到借機或者上門維修，如果唔包人工，就買嚟都冇意思。
另外，要留意個賠償點做，最高賠幾多？如果部機型號太舊，冇得整，會點賠？賠番買價定係按市價賠？抑或可以換過另一個型號產品？」
社會服務
報料熱線：29290000
社會服務熱線：29908288
蘋果日報慈善基金：29908688
傳真：37112468
網上捐款： http://charity.atnext.com/donate
各類表格： http://charity.atnext.com/forms
電郵：mailto:[email protected]
匿名投訴恕不處理。一經投訴，本報保留刊登權利。