早前古巨基（基仔）和金牌大風的合約風波搞到滿城風雨，更掀起金牌太子爺鄭中基和基仔的「雙基罵戰」，由於基仔將於日內加盟英皇，所以前晚新任金牌大風香港區行政總裁的陳輝虹，與英皇高層吳雨齊齊到尖沙嘴出席「香港音像版權有限公司二十五週年」活動時，就成為全場焦點。
鬧醒基仔
陳輝虹和吳雨亦十分識做，兩人面對鏡頭時狀甚老友，更笑住握手，當現場記者問到何時公佈基仔的加盟時，吳雨即抵死反問陳輝虹，陳輝虹即說：「係你公司嘅嘢，唔係我公司嘅嘢。」吳雨亦扮儍說：「唔知，冇咁嘅事，乜基先？鄭中基呀？佢走唔一定嚟我哋度，輝虹升咗CEO，或者佢發功呢。」在旁的陳輝虹即遮住半邊嘴陰陰笑，對於之前曾發火寸基仔搞新聞，吳雨即插嘴說：「警惕吓啫，唔鬧唔得大，我哋唔會鬧人，只係會錫人。」
此外，側田日前被周刊以影射性質指他去夜總會，前晚他甚大反應說：「冇啲咁嘅事，搞錯呀？呢啲講乜都得，絕對冇咁嘅事，就算係都用自己實力。」記者取笑他憑實力追女仔，他即表示這些話題太敏感，並叫大家不要屈他，因為他的形象已被寫到很衰。
採訪、攝影：王連連