近數個星期Game壇好靜！只得幾隻電影改編Game撐場。不過聽日就開始有好嘢玩，除咗《infamous》夠照外，《Damnation》就狂Sell動作射擊及不同的電影橋段。首先主角打扮好似《狙魔人》個HughJackman，不過戴咗鍾博士頂帽，而架電單車又令人諗起蝙蝠俠架Bat-pod。特殊能力就有如蜘蛛俠一樣可以飛簷走壁，穿牆撞橋。
文：泰利
為報仇爆你頭
《Damnation》解作詛咒、毀滅，又係潮流最興的第三身動作射擊遊戲。主角退役軍人Rouke因為老婆離奇死亡而踏上尋仇之路，並加入咗抗惡勢力組織PrescottStandardIndustries（PSI）的游擊隊Peacekeepers，誓要殺入敵陣報仇雪恨！
製作公司BlueOmega搞開電影，呢隻係首隻製作的電玩遊戲，遊戲標榜注重電影感，版圖大自由度高，所以Game中有兩個轆、四個轆仲有纜車畀你當交通工具，有些地方更要揸電單車飛跳先去到，主角可以游繩、飛跳、爬牆穿梭於槍林彈雨中，利用地形特徵發掘不同殺敵路線，就如面對身穿重裝甲的敵兵時，便要繞道去佢背面爆佢頭。
穿牆透視打怪人
敵人古靈精怪，有好似IronmanMarkI識射導彈的機械兵，又有披上狼皮的野人，更有貌似喪屍的赤膊怪人，男主角除可遠程用槍玩爆破外，近身都有大量特技動作連招為敵人放血，整體血腥度幾高。而主角除有強勁跳躍力，更有一種稱為SpiritVision（靈視）的神奇能力，啟動之後可以睇穿牆，預測敵人行動，從而制訂戰術掌握先機或避免被圍攻的危機。
８人上網敵人更多
猛男少不免有個性感拍檔，雖然唔明點解要着咁少布去打仗，但起碼夠養眼。線上模式可以容許玩家和老友合作面對多種任務，在合作模式中敵人數量激增，而且版圖中亦會有更多地方需要合作才可達成。同時XboxLive!亦支援2-8人對戰，始終Online模式在現今家用機遊戲中已擔當不可或缺的重要角色，令耐玩性大增。
Profile
遊戲平台：XB360、PS3、PC
遊戲類型：動作射擊
推出日期：5月27日
遊戲人數：1-2人、XboxLive：2-8人