城大舉辦中國高級法官研修班，噚日舉行開學禮，唔少本港法律界猛人出席，包括終院首席法官李國能、律師會新任會長王桂壎，以及代表最高中央人民法院帶團來港嘅國家法官學院副院長張維，廿幾個內地法官對李官最有興趣，當佢明星排隊合照。
中、港法制有別，王桂壎話內地法官來港研修唔係得個睇字，因為近年普通法同大陸法已經越來越接近，內地部份法院判案，都開始採取本港普通法引用以往案例「先例可援」嘅做法。
加籍官質疑內地法制
大陸法治制度同香港、西方無得比，不過硬件卻一流，王律師話，上周五有班加拿大法官去內地訪問，之後同佢分享見聞，人人都大讚內地法庭設備先進過加拿大，遺憾係只可參觀法庭，卻冇得旁聽審訊，加拿大法官對於內地法官都係中共黨員晒頭，質疑咁做司法被黨指揮，唔夠獨立。
黨大於法、法律為黨服務呢啲有中國特色嘅司法制度，豈是老外容易明白嘅事？八方問王律師有冇同感，佢話：「見仁見智。」