息影影后顧美華的胞妹顧麗華本月初疑因不堪婚姻破裂，在家中自縊身亡。愛妹心切的顧美華接受商台節目訪問時代妹出頭，大爆胞妹曾受第三者電話騷擾，她指第三者除了公然表示今年最想收到的生日禮物是「係你死」外，還在顧麗華自殺前夕，打電話騷擾她。
息影影后顧美華的胞妹顧麗華，和上市公司泰昇集團控股有限公司副主席兼董事總經理馮潮澤結婚20多年，並育有兩名兒子。去年7月，馮潮澤被踢爆和亞視女藝員吳亭欣密會，顧麗華去年12月在寓所內打空氣針企圖自殺，幸被及時發現。但本月2日她在家中自縊身亡，終返魂無術，本月20日家人已為她舉行喪禮。
指第三者要做馮太
顧美華日前接受商台節目的錄音訪問昨日播出，她稱讚妹妹樂觀和顧家，即使面對婚姻突變，仍處處維護丈夫，她更暗示今次胞妹自殺是被人逼得太緊，並指胞妹曾受第三者的電話騷擾和威脅，她說：「妹妹走咗第二日，佢老公攞咗妹妹嘅日記畀我，我睇佢日記知佢好多心聲，其實佢一路以嚟已接受呢樣嘢（指第三者），佢寫如果第三者真係有咗，就係天意，佢都準備去簽離婚，佢係接受……而且佢都唔想老公做唔負責任嘅人，我哋所知佢（指第三者）係有三次（懷孕）……第三者一定要做馮太，我諗我個妹都會讓位。」
顧美華續說：「妹妹19號設靈，有一對夫婦朋友同我講，我妹妹收過第三者電話，同佢講今年生日最想收到嘅禮物係你死，當時我唔知嬲定乜，我個妹仲瞓喺度，係當時個感覺，係唔信一個人可以諗得出嚟嘅說話……（第三者）時不時都電話騷擾佢，連妹妹喺加拿大嘅姑奶都聽過呢件事，個女人成日打電話畀佢，所以妹妹床頭電話抆走咗，怕咗佢。」
馮潮澤接電話外出
在訪問中，顧美華又談及妹妹自殺前一天的情況，她說：「我妹妹5月2日佛誕走，係佢老公同我講，5月1日佢哋兩公婆去咗睇戲同食飯，其間第三者不停咁打畀馮生，馮生唔聽就打畀我妹妹，打到之後個男人出去見佢……（馮潮澤）講過想修補（指夫妻關係），我就好懷疑，既然你話要同老婆修補，點解女人打畀你就要見佢，佢話個女人家冇乜job，叫佢support佢多一陣……佢電話一路冇停，到早上六點鐘，個女人打到屋企，工人聽完叫個男人聽，（馮潮澤）又去咗，我知當晚超過50個電話，你話我做女人，點瞓……（第三者）一定要見面，唔係就踩到上妹妹屋企。」
顧美華強調妹妹在第一次打空氣針自殺不遂後，有看精神科醫生和定時食藥，也曾向親友表示知錯，並保證不會做儍事，就算本月2日胞妹自殺當日，她的行為也表現正常，下午到銅鑼灣參加浴佛儀式後，便做按摩和與友人e-mail聯絡，不過到晚上10時至11時這個空白期，顧美華就不清楚胞妹遇到甚麼事。
可憐姨甥目擊喪母
說到傷心處，顧美華忍不住低聲痛哭，並自責做得不夠，她說：「（胞妹）有冇收過乜電話，係一個謎，有啲朋友話可以check屋企電話，但我妹走咗後，佢屋企已經換咗電話號碼。佢之前又唔換，如果驚影響個老婆就應該換。」主持人表示曾聽聞其妹說過她會照顧第三者所生的孩子，顧美華說：「呢個係妹妹性格，佢咁忍讓，佢哋都唔放過佢，只要對方肯稍為諗一諗，自己控制少少就唔會發生呢啲慘劇，係人命喎！」
顧美華和妹妹感情要好，胞妹自殺後，顧美華傷心得哭不出來。其年邁的父親因妹妹婚變，在3個月內體重下降40磅，現在也傷心到拒絕進食，但最令顧美華擔心的是12歲的姨甥仔，因胞妹上吊自殺當日他在場全程目擊。
撰文：葉雪