無綫以前拍過多部電視電影，不過已經停止製作咗成6、7年，家又再拍番，而且仲嚟個幕後大兜亂，因為今次接手拍嘅係綜藝科幕後高層，佢哋甚少拍劇，馮仁昭收到料，其中一個故事搵嚟成20年冇拍劇嘅劉德華主演，佢88年同邵美琪拍完《天狼劫》之後，就冇再拍劇，今次係佢向無綫報恩嘅時候。
同期拍幾米故事
呢個故事題材係講魔術師，唔使問華仔梗係扮魔術師啦，因為佢近年熱愛玩魔術，之前周杰倫仲睇中佢，想合作拍部魔術電影，不過後來告吹咗，不過華仔一直心思思，家無綫由高級經理（綜藝及音樂科）陳家揚負責拍呢套電視電影，佢話：「我哋同華仔傾咗半年，劇本都畀佢睇咗，佢OK咗，最緊要係佢鍾意先會拍，華仔畀咗好多意見，女主角就未定，華仔啲魔術玩得好好，搵到佢返嚟拍係時機際遇。」陳家揚話未知係咪拍一個半小時，或者分上下集都未定。
另外，無綫製作主任（綜藝及體育科）何小慧，將有份拍電視電影式嘅單元故事，形式有啲似以前拍過嘅《Lovingyou》，今次無綫買咗幾米其中一本書《你們我們他們》嘅版權嚟拍，何小慧話：「家着手度劇本，起碼拍十個單元故事，因為幾米啲書大部份係插畫，所以要喺啲插畫度再寫故事。」
