接替恒生（011）一姐梁高美懿，喺獅子行個工商業務環球聯席主管寶座嘅郭懷道（JohnCoverdale），噚日華華有幸同佢午膳。佢老哥健談親和，雖然由滙控旗下嘅沙地英國銀行調嚟香港冇耐，但原來郭生30年前已經係香港通，事關佢77年加入滙豐後，一直留喺香港呢塊滙豐福地，差唔多85年先調往海外。現時佢家住港島山頂，俯瞰東方之珠夜景，佢話璀璨程度，比30年前有過之而無不及。
最敬佩浦偉士
70年代，中環總行就係獅子行總部，前滙控（005）大班浦偉士坐鎮香江，統管國際業務部，郭懷道記得當時浦大班雖已身居要職，但低級小職員一樣可以直接同佢溝通議事，上下員工打成一片，團隊精神發揮得淋漓盡致。
對於同呢位滙豐一代巨擘曾經共事，郭懷道話受益終身，亦會以浦老為榜樣，希望做到百川滙海，各級員工真知灼見都能兼收並蓄。