每年春夏之交，北方總係被一股政治高氣壓籠罩，今年六四20周年，呢股高氣壓更大規模集結急速南下，好多傳媒機構製作六四20周年新聞特輯時如履薄冰，連港台都不例外，干預編輯自主烏雲蓋頂，陰霾密佈。
港台電視節目《鏗鏘集》好多個月前已籌備回顧六四特輯，一連四集節目上星期一起出街，噚晚播出第二集。港台中人向八方報料，指台長黃華麒十分關注呢幾集《鏗鏘集》內容，過問製作大綱外，更要求剪輯時「監場」，後來唔知事忙抑或其他原因冇到，只係在節目出街前攞咗盒帶過目。
新聞部早準備播專題
港台中人指，台長雖然係總編輯，但慣例上唔會過問製作過程以體現編輯自主，要求剪輯時監場，甚至出街前先睇片，更加極之罕見，佢話記憶中前台長張敏儀就未嘗咁做，不過麒叔係拍攝紀錄片專家，想重操故業過吓癮露兩手，下屬條氣唔順亦冇得異議。
麒叔對《鏗鏘集》回顧六四似乎十分緊張，據講日前特別召見電視部高層，問清楚仲有幾多六四嘢未出街，知情人士稱，該高層如實滙報已製作準備出街節目安排，麒叔聽完冇要求加碼，反而認為夠皮，即是港台唔使再製作有關六四嘅電視節目。
既然台長有指示，下面啲人自然曉煞車，影響所及，《議事論事》下星期四六月四日當晚，想直播維園燭光集會計劃都可能有變，如果做live直播非一般香港人高呼平反八九民運、追究屠城責任口號，恐怕有人烏紗不保，命都冇呀！《議事論事》製作人員則同八方講，仍在研究當晚直播安排，暫時未有決定，但強調冇受到任何高層壓力，主要係解決技術問題，直播機會都幾高。
麒叔事事親力親為，干預港台編輯自主似層層，好彩新聞部早有準備，製作一連九輯六四專題，今日起喺朝早《新聞天地》播出，當中包括訪問學運領袖。六四變成香港傳媒禁忌令人憤怒，八方聽聞多個月前，西環已私下搵傳媒高層傾偈，好理解咁話，今年六四新聞可以報道，但不必大做，國家今天這麼富強，20年前的事，說來幹啥！
mailto:[email protected]