已經流傳好長一段時間嘅中聯辦人事變動，噚日終於塵埃落定，副主任彭清華接替高祀仁做主任，「第二支管治隊伍」換班，對香港真係好大件事，重要程度拍得住有新特首，被網民稱為CCTVB嘅無綫，噚晚六點半新聞當然有報道，不過好可惜，又出事。
無綫報道「第二支管治隊伍」換領導人新聞時，竟然錯將另一個副主任黎桂康當作彭清華，片段出咗黎桂康將相，唔少政界人士睇到都十分愕然，立即向八方報料，八方正在睇新聞，當然見到無綫出事啦。
如果係真正CCTV，出錯領導人相片，負責同志隨時人頭落地，不過CCTVB應該無事，八方相信西環並冇即時詐型，因為網上版仍舊出黎桂康張相，冇「竄改」歷史，11點晚間新聞先更正。